Tantrums त्रागा अर्थात टॅन्ट्रम
त्रागा अर्थात टॅन्ट्रम दुसरं वर्ष ओलांडून तिसरं लागलं की ह्या कार्यक्रमाला सुरुवात होते. आता आपल्याला काय हवंय , काय नकोय , काय आवडतंय , काय नावडतंय आणि थोड्या प्रमाणात स्वतःच्या भावना हे समजायला लागतं. आपल्या हाताने सगळं करायचं असतं. पण ते न जमल्याने किंवा भावनांचे नियंत्रण न करता आल्यास मोठ्याने भोकाड पसरण्यात येते. हातपाय आपटणे , जमिनीवर लोळण घेणे , वस्तू फेकणे , आईबाबांना फटके मारणे , काही विचारू नका. आपल्या गोंडस बाळाचे हे रूप आईबाबांना घाबरवून सोडतं. हा असा कार्यक्रम बरेचदा बाहेर कुठे गेले असताना चारचौघात होतो. आणि त्यामुळे आईबाबांना कानकोंडं होऊन जातं. अशावेळेस प्रथम लक्षात ठेवायचं की आपण शांत राहायचं. आपण घाबरून बावचळून गेलो तर कार्यक्रम अजून वरच्या पट्टीत जाऊन प्रकरण हट्टीपणाकडे पोहोचतं. दुसरं म्हणजे असा तमाशा सर्वच मुलं करतात. त्यामुळे कानकोंडं न होता बाळाला जवळ घेऊन तिथून निघून जा. जेणेकरून ज्या कुठल्या घटनेमुळे , वस्तूमुळे ह्या त्राग्याची सुरुवात झाली होती , तिथून त्याचे लक्ष विचलित करता येईल. लक्षात घ्या की त्यांचा त्रागा होतो कारण त्यांना काय ह...